Алдымен жиналғандар жаңарған «Зейін-Атырау» ерекше балаларды дамыту орталығының жұмысымен танысты. Онда қазір 100-ден астам сөйлеу қабілеті бұзылған, аутизм, церебральды сал ауруы және Даун синдромы бар балалар ем алуда. Samruk-Kazyna Trust қоры орталықты оңалтуға қажетті жабдықтармен қамтамасыз ету мақсатында 27,5 млн тг қаражат бөлген. Сондай-ақ 50 бала  қордың арнайы сертификатына ие болып, тегін ем алуда. Орталық жұмысымен танысқан АМӨЗ-дің жұртшылықпен байланыс, мемлекеттік органдармен, мердігерлік ұйымдармен жұмыс істеу және әкімшілік мәселелер жөніндегі департаментінің директоры Серік Арыстан ерекше балалармен жұмыс істеудің үлкен жауапкершілік екенін, сондықтан мұнда қызмет атқаратын мамандарды әлеуметтік қолдауға, біліктіліктерін арттыруға аса мән беру керек екенін айтты.
Әрі қарай пресс-жорық мүшелері балаларға арналған кешенді оңалту, диагностика және кеңес беру қызметтерін көрсететін «Қамқорлық» оңалту орталығына барды. Мұнда жылына 600 балаға дейін тегін емделеді. Жалпы «Қамқорлық» жобасы аясында Samruk-Kazyna Trust қорының қаржылай қолдауымен еліміздің барлық өңірінде 15 оңалту орталығы, 16 инклюзивті кабинет және 7 ерте араласу орталығы ашылды. Оларды толықтай жабдықтау үшін 3 млрд тг астам қаражат бөлінді.
Samruk-Kazyna Trust қоры әлеуметтік осал санаттағы ересектерді қолдауға да ерекше назар аударады. Оған дәлел ретінде Атырау қаласында ашылған Іскер әйелдер қауымдастығының «Әрекет» жобасын атауға болады. Жоба шеңберінде 100 жалғызбасты, көпбалалы және жұмыссыз әйел тігінші, аспаз, кондитер, шаштараз және клининг салаларын меңгеруде. Бір жарым айлық курс аяқталған соң олар өз істерін ашу үшін арнайы гранттарға ие болады немесе жұмысқа орналасуға мүмкіндік алады. Samruk-Kazyna Trust жобаны қаржылай қолдауға 48 млн тг бөлген.
Бұдан кейін баспасөз турына қатысушылар «Атырау. Маленькая страна» әлеуметтік қалашығына бас сұқты. Мүмкіндігі шектеулі балаларды оңалту үшін құрылған қалашықта канистерапия, иппотерапия және еңбек терапиясы өтеді. Ал шаруашылықты жүргізу үшін «жасыл технология» қолданылады. Биыл Samruk-Kazyna Trust  қоры қалашықты  шағын гибридті жел-күн электр станциясымен және шаруашылық ғимараттар мен әкімшілік үй-жайларға арналған конвекторлық жылытқыштармен қамтамасыз ету үшін 37,5 млн теңге бөлді. Құрылғылар іске қосылған соң әлеуметтік қалашықта электрмен жабдықтау толығымен автономды болады деп күтілуде.  
    Тур соңында «Самұрық-Қазына» АҚ басқарушы директоры Ғибрат Ауғанов пен Samruk-Kazyna Trust  басшысы Альфия Адиева аталған әлеуметтік жобаларды іске асыруға мұрындық болған еншілес компаниялардың өкілдеріне алғыстарын жеткізді.
    «Биыл біз өзіміздің жасаған жұмыстарымызды мейлінше жан-жақты ақпараттандырып жатырмыз. Осындай әлеуметтік маңызы бар жобалар көбейе берсін. Samruk-Kazyna Trust  - «Самұрық-Қазына» АҚ-ның және оған қарасты осы өңірде орналасқан Атырау мұнай өңдеу зауыты, Ембімұнайгаз, KEGOK, Қазақстан Темір Жолы, Қазақтелеком, Қазпошта сияқты мекемелердің атынан қайырымдылық қызметтерді көрсететін бірыңғай оператор. Еншілес компанияларға үлкен алғыс айтамын», - деді қордың  бас директоры.
«Самұрық-Қазына» компаниялар тобы тек Атырау облысында соңғы бес жылда 1 миллиард теңгеден астам сомаға 19 әлеуметтік жобаны іске асырды. Жобалар өңір тұрғындары үшін маңызды мәселелерді шешуге және үкіметтік емес ұйымдардың әлеуметтік бастамаларын қолдауға бағытталған. Тек биылдың өзінде өңірде 375,5 млн теңге сомасына 7 жоба мақұлданды.