Жылу және электр энергия өндірісі «жасыл аймақта» деп танылды.
Орталық және жергілікті атқарушы органдардың жылыту маусымына дайындығын тексеру комиссиясы жылу электр орталықтарында ағымдағы жылы орын алған технологиялық бұзулар, кадр жетіспеушілігі, жабдықтардың тозуы мен нысанды пайдалану мерзімі туралы деректер зерттелді. Нәтижесінде комиссия Атырау мұнай өңдеу зауытының Жылу және электр энергия өндірісі қауіпсіз «жасыл аймақта», ал энергетикалық жабдықтардың тозу көрсеткіші 46,72% құрайды деген шешімге келді.
«АМӨЗ» ЖШС-нің Жылу және электр энергия өндірісі (бұған дейін Жылу электр орталығы) 1945 ж Каспий маңы аймағындағы алғашқы энергетикалық нысан ретінде құрылды. Оның басты міндеті – зауытты сенімді және үздіксіз жылу және электр энергиясымен, технологиялық қондырғылар мен қалдық жылу қазандықтарын қысылған және техникалық ауамен, химиялық тазартылған, минералсыздандырылған, қоректік, желілік сумен, сондай-ақ кәсіпорынды ішінара ыстық сумен қамтамасыз ету.
Ашылған жылдан бері Жылу және электр энергия өндірісі жаңғырудың бірнеше сатысынан өтті. Соның нәтижесінде орталық энергия жүйесіндегі ақаулар кезінде зауыттың ескі бөлігіндегі қондырғылардың тоқтап қалуын азайтуға мүмкіндік туды.  2006-2013 ж.ж аралығында жүргізілген ауқымды жаңғырту жұмыстары кезінде 3 жаңа қазандық агрегаты, 2 құбыр агрегаты іске қосылып, 4 американдық қазандық ресейлік қондырғылармен алмастырылды. Нәтижесінде қазандықтардың өндірістік қуаты сағатына 275 тонна буға, ал электроэнергия өндіру қуаты 30МВт-ға дейін жетті.
Жылу және электр энергия өндірістің қуатын ұлғайтып, зауытты электр энергиясымен қамтудың сенімділігін арттыру мақсатында алдағы уақытта газтурбинді станция салу жоспарланған.
Технологиялық бұзуларды азайтып, нысанның жұмысқа қабілеттілігін арттыру үшін барлық жабдықтар бекітілген жоспар бойынша жөндеуден өтеді. Апатты жағдайлар мен өртке қарсы оқу-жаттығулар, энергоресурстарды үнемдеу бойынша іс-шаралар жүргізіледі. Қызметкерлердің біліктілігін арттырып, электр энергиясы саласындағы әлемдік тәжірибені енгізу мақсатында семинарлар өтеді.