Зауыттықтардың алдында сөз сөйлеген штаб мүшелері әділетті мемлекет, әділетті экономика және әділетті қоғам сынды 3 бөлімнен тұратын сайлауалды бағдарламаны егжей-тегжейлі түсіндірді.  Қ.Тоқаевтың 2019 жылы мемлекет басшысы қызметіне келгелі бері атқарған жұмыстары мен алға қойған мақсаттары туралы да айтты. Олардың сөздерінше,  қазіргі президенттің басты мақсаты – демократия, заңның үстемдігі және теңдік принциптері сақталатын күшті мемлекет құру.
    Үгіт-насихат тобы мұнай-газ саласының дамуы мәселесін де сырт айналып өткен жоқ. Айтуларынша, тәуелсіздік жылдарында елімізге сырттан 300 млрд доллардай инвестиция құйылған болса,  соның 240 млрд доллары, яғни 80%-ы мұнай-газ саласына жұмсалған. Алдағы 7 жылда экономикаға қосымша 150 млрд доллар тікелей шетелдік инвестиция тарту жоспарланған.
«Тәуелсіздік алған жылыдары Қазақстан 26 млн тонна мұнай өндірсе, қазір бұл көрсеткіш 85-90 млн тоннаға жетті. Атырау мұнай өңдеу зауыты - 77 жылдан астам уақыт жұмыс істеп келе жатқан қазақ мұнай өңдеуінің флагманы. Қ.Тоқаев өз бағдарламасында еліміздегі мұнай өңдеу көлемін 21 млн тоннаға жеткізу қажеттігі туралы да айтты. Бұл нәтижеге жетуде АМӨЗ-дің үлесі зор. Зауыт қазір жылына 5,5 млн тонна мұнай өңдейді. Сонымен қатар мемлекет басшысы өз бағдарламасында зиянды заттардың эмиссиясын 20%-ға азайту мәселесін де көтерді. Осы және өзге де оң мақсаттарды жүзеге асыру үшін  қазір АМӨЗ жанынан құрылған қоғамдық экологиялық кеңес жұмыс істеуде. Президент айқындаған бағытпен даму жолында зауыт алдында үлкен міндеттер тұр», - деді облыстық қоғамдық штаб мүшесі Максим Ізбасов.
   Зауыт жұмысшылары атынан сөз алған Григорий Заржевский президент сайлауы – кез-келген ел үшін айтулы оқиға және саяси жаңғырудың алғашқы қадамы екенін жеткізді.
   «Біз озық технологиялармен қатар өндірісті басқарудағы үздік тәжірибелерді игеріп жатырмыз  және ортақ үйіміз – Қазақстан Республикасын дамыту үшін атсалысуға дайынбыз. Президентімізге дауыс беру - тұрақтылық пен болашаққа дауыс беру деп санаймын. Алдағы сайлау науқаны – күрделі саяси жаңғырудың алғашқы қадамы болмақ. Еліміздің         Қ. Тоқаев айқындап берген саяси бағытты ұстанып, қарқынды дами түсетініне сенімдімін, - деді ол.
   Өнеркәсіптің бас директоры Мұрат Досмұратов елімізде орын алып жатқан жағдайлардың әр қазақстандыққа қатысы бар екенін айтып, зауыттықтарды саяси сауатты әрі белсенді болуға, Қазақстанның болашағы үшін дауыс беруге шақырды.