Облыстық ақпаратты –насихаттық тобы құрамында: Атырау қаласы әкімінің орынбасары Гүлмира Шакирова, облыстық сәулет және қала құрылысы басқармасы басшысының орынбасары Гүлбарышын Арыстанова, облыстық Жұмыспен қамтуды үйлестіру және әлеуметтік бағдарламалар басқармасы басшысының орынбасары Бақытжан Мұхамбетов, Қазақстан Коммунистік Халық партиясы облыстық комитетінің хатшысы Асхат Жұмағалиев және Атырау инженерлік-гуманитарлық колледжі директорының орынбасары Жанат Асбаевалар зауыттықтармен кездесті. Кездесуді «Атырау МӨЗ» ЖШС Бас директорының орынбасары Азамат Акишев ашып, жүргізіп отырды. Келелі басқосуда Елбасы Жолдауының басты қағидаттары түсіндірілді. -Елбасының 2015 жылғы 30 қарашадағы Жолдауы сеніміміздің үдесінен шықты. Ол ертеңгі күнге сенімімізді арттырады. Жолдауда әлеуметтік саясат, мүлікті заңдастыру, «100 нақты қадам», «Нұрлы жол» сияқты маңызды аспектілер қарастырылған,-деп атап өтті сөз алған Атырау қаласы әкімінің орынбасары Гүлмира Шакирова. Кездесу барысында зауыт ұжымына жолдаудың негізгі ережелері жан-жақты түсіндірілді. Әсіресе, әлеуметтік мәселеде биыл бюджеттік сала қызметкерлерінің жалақысы 28 пайызға көтерілді. Биылғы оқу жылынан бастап 12 жылдық орта білім жүйесі енгізілмек. Жұмыспен қамтуда ашықтық бар. Мүгедектер мен сотты болған азаматтарды жұмысқа тұрғызу жолға қойылды. Мұның бәрі Жолдау жүктеген міндеттер екенін ақпараттық-насихаттық тобы өкілдері нықтап айтып берді. Медициналық қызметтің қолжетімділігі, әсіресе, қарттар мен мүгедектерге жеңілдіктер жайы толыққанды түсіндірілді. Зауыттықтар өз тарапынан ақпараттық-насихаттық топ мүшелеріне медициналық қызмет көрсетуге және зейнетақы қорын пайдалану ерекшеліктеріне байланысты сұрақтарын қойып, тұщымды жауаптар алды. Кездесуді қорытындылаған зауыт Бас директорының орынбасары Азамат Акишев облыстық ақпаратты-насихаттық тобының мүшелеріне Елбасы Жолдауын ұжымға түсіндірудегі жұмыстарына алғысын білдірді.