Мақсат - адамның өзіне қойылатын талабы, оның қайратты шешімі. Мақсат қойғанда, әбден ойлану керек, армандау керек. Себебі, ол мақсаты айқын, адал болуы тиіс. Тұрлыбек Қалиманов бізбен әңгімесін осылай өрбітті. Алдына мақсат қойған ол Атырау мұнай және газ институтын «қызыл» дипломмен бітірді. Зауытқа келгенше, 6-7 жыл мұнай өндірісі саласында қызмет еткен. Табысы да жақсы болыпты. 2014 жылы зауытқа жаңа ароматикалық көмірсутектер өндірісіндегі қондырғыға технологиялық сорғылар машинисі болып қабылдаданды. Осы кезеңнен бастап Тұрлыбек өз орнын тапқандай болған. Жұмысына ыңғайы бар, ынтамен істейді. Мамандығына сай келгесін шығар. Бұрынғы жұмыс орындарында мұндай ынта болмаған екен. Сондықтан да маман өз еңбегіңе құштарлық ғана жеңіске жетелейтінін айтады. «-Зауытқа алғаш келгенімде қондырғы механигі Максим Карабасов қамқорлығына алып тәрбиеледі. Атқаратын қызметімнің қыр-сырын үйрендім. Оған дейін жаңа технологиялық қондырғылардың маңызы жөнінде оқу дайындығынан өткен болатынбыз. Ал, тәлімгерім маған тәжірибе жүзінде машықтандырды. «Үздік маман» байқауына еңбек өтілі 3 жылға жетпегендер арасында сайысқа түсуіме де осы тәлімгерімнің ықпалы зор екенін атап өткім келеді. Несі бар, біліктілігім мен өзіме сенімді болғасын қатысып көруді шештім. Әрине, жеңімпаз болам деп ойлаған да емеспін. Сайыстың әр кезеңінен сәтті өте бастағанда келесі сатыға дайындығымды күшейтіп, өзімді қайрай бердім». Осындай қайсар да талапшылдығының арқасында ол жеңімпаз атанды. Ол әрине, технологиялық сорғылар машинисі саласында тәжірибесінің аз екенін мойындайды. Бұл тұрғыда біліміне қоса, тәжірибенің де болғаны құба-құп. Тұрлыбек Қалиманов енді алдағы «ҚазМұнайГаз» Ұлттық компаниясы еншілес мекемелері арасындағы сайысқа терең дайындыққа кіріскен. Кемшін кеткен тұстарын толықтырып, алған сабағын пысықтап, үлкен байқауға тың жігермен кіріспек.