«ҚазМұнайГаз» басшысы Атырау МӨЗ-дегі жөндеу жұмыстарымен танысты

11 қазан күні «ҚазМұнайГаз» ҰҚ» АҚ басқарма төрағасы Мағзұм Мырзағалиев жұмыс сапары шеңберінде АМӨЗ-де болып, зауыттағы жөндеу-алдын алу жұмыстарының барысымен танысты.
Еске сала кетейік, ҚР Энергетика министрлігімен бекітілген жоспарлы-алдын алу жөндеу кестесіне сәйкес 2022 ж 1 қазанында АМӨЗ-де технологиялық қондырғыларды жөндеу жұмыстары басталды. Зауыттағы технологиялық қондырғыларды жөндеу алғаш рет кезең-кезеңмен жүруде. Бұл мұнай өнімдерін шығаруды тоқтатпауға мүмкіндік береді. Жөндеудің мұндай тәсілі Қазақстандағы мұнай өңдеу зауыттарында бұрын-соңды қолданылмаған.
АМӨЗ-дің бас директоры Мұрат Досмұратовтың айтуынша, 9 ай ішінде зауытта өңделген мұнай көлемі 4,2 млн т құрайды. Бұл жыл басындағы жоспардан 112 мың тоннаға артық.  Сондай-ақ 1 млн т автобензин, 1,2 млн т дизельді отын, 114 мың т әуе отыны мен басқа да мұнай өнімдері өндірілген.
«Өткен жылы Атырау мұнай өңдеу зауыты жөндеу жұмыстарына тоқтатылмай, бір жыл ішінде мұнай өңдеу көлемін рекордты көрсеткішке дейін жеткізді. Биылғы жөндеудің зауыт жұмысын толық тоқтатусыз жүзеге асып жатқаны да қуантарлық жағдайлардың бірі. АМӨЗ жөндеу кезінде 50-70 % тең қуаттылықпен жанар-жағар май шығаруды және жөнелтуді жалғастыруда. Жалпы алғанда, Атырау мұнай өңдеу зауыты өндірістік жоспарды толықтай орындайды деп күтілуде», - деді М.Мырзағалиев.
Кездесуде бұдан бөлек зауытты энергиямен қамтамасыз етудің сенімділігін арттыру, «Tazalyq» жобасын іске асыру, Теңіз кенішінде өндірілетін мұнайды өңдеу мүмкіндіктері мен цифрландыруға арналған жобалар  туралы да сөз болды.
Жиын соңында ҚМГ басшысы жоспарлы жөндеу жұмыстарын уақытылы әрі сапалы аяқтау, цифрландыру мен автоматтандыруға арналған жобаларды жүзеге асыруды жалғастыру туралы тапсырма берді.  Сонымен қатар  М. Мырзағалиев зауыттағы электр энергиясы жүйесінің үздіксіз жұмысын қамтамасыз етудің маңыздылығы туралы айтып, АМӨЗ басшылығына  «KEGOC» АҚ-мен бірлесе отырып зауытты энергиямен қамтамасыз етудің сенімділігін арттыруға арналған іс-шаралар жоспарын іске асыруды жалғастыруды тапсырды.