Зауыттың түрлі бөлімдерінен жиналған 13 қатысушы бес кезең бойынша білімдерін сынады. Олар «Таныстыру» бөлімінде өздері туралы ақпаратты үш тілде жеткізсе, «Дәстүр» кезеңінде қазақ халқының тұрмыс-салты туралы мемлекеттік және орыс тілінде айтты. «Сен білесің бе?» деп аталған турда ұлы тұлғалар туралы ағылшын тілінде мәлімет беріп, «Ақын шығармалары» кезеңінде мәнерлеп оқу қабілеттерін көрсетті. Соңғы «Полиглот» бөлімінде зауыттың өткені мен бүгіні және танымал кинофильмдер туралы сұрақтарға жауап берді. Қатысушылар тіл байлығы, сөйлеу шеберлігі және жауаптың мазмұндылығы бойынша бағаланды.

Қазылар алқасының төрайымы Атырау облысы Мәдениет және тілдерді дамыту басқармасының «Тіл» оқу-әдістемелік орталығы басшысы Сауле Кубашева зауыттықтардың үш тілді меңгеру деңгейінің жоғарылығын атап өтіп, жүлделі орын иегерлерін марапаттады. Сайыс қорытындысы бойынша III орынды құқықтық қамтамасыз ету бөлімінің заңгері Ерлан Кенжегалиев иеленді. II орын «Орталық зауыт зертханасы» сынақ орталығының химиялық талдау зертханашысы Динара Кенжебаеваға, ал I орын мұнай өнімдерін өндіру және тасымалдау өндірісінің инженер-механигі Бисултан Терекбаевқа бұйырды.

Сонымен қатар «Полиглот» номинациясында жылу және электр энергиясы өндірісінің химиялық талдау зертханашысы Айнұр Орынбасарова, ал «Тіл жанашыры» номинациясында бюджеттік және экономикалық жоспарлау бөлімі басшысының орынбасары Самат Джанглишов үздік деп танылды. «Көркем сөз шебері» номинациясында материалдық-техникалық жабдықтау бөлімінің экономисі Данагүл Нәсіпқалиева, «Үздік дәстүр жаршысы» номинациясында "Орталық зауыт зертханасы" сынақ орталығының инженері Дастан Ғалымжанұлы жеңіске жетті.

Жеңімпаздар мақтау қағазы және ақшалай сыйақымен марапатталды.