Hitachi компаниясының орталықтан тепкіш компрессорлары зауытты жаңғыртудың 3 кезеңі аясында мұнайды терең өңдеу кешенінің құрылысы кезінде технологиялық қондырғыларға орнатылды. Олар реактор блогынындағы құрамында сутегі бар газдың айналымына, майлы газды қысуға және айдауға қолданылады.
АМӨЗ басшылығымен кездесу барысында Юичи Тацуми жабдықтың сенімділігін сақтау үшін жоспарлы жөндеу және қосалқы бөлшектерді ауыстыру керектігін атап өтті. «Компрессорлар – өте күрделі динамикалық жабдық. Құрылғыны жөндеу және техникалық қызмет көрсету жұмыстарының біздермен бірлесіп атқарылуы маңызды», - деді ол.
АМӨЗ мамандары қонақтарға бұрын аутсорсингте болған сервистік компаниялардың функциялары биылдан бастап зауытқа кері қайтарылғанын айтып, кәсіпорынның жөндеу-механикалық цехының жұмысшыларын оқыту жөнінде ұсыныстарын жеткізді.
«Зауыттың алдында құрал-жабдықтарды жөндеу мен қызмет көрсету жұмыстарын өз күшімізбен атқару міндеті тұр. Келесі жылы зауытта қолданылатын компрессорларды өндіруші компанияларға біздің жұмысшыларымызға тренингтер өткізіп, оларды оқытуды ұсынбақпыз», - деді жабдықтарға техникалық қызмет көрсету және жөндеу бойынша өндірістік активтерді басқару департамент директоры Рахымжан Жанғабылов.
Юичи Тацуми өз кезегінде бұл ұсыныстың орынды екенін айтып, жапондық компрессорларды жөндеу және техникалық қызмет көрсету жұмыстарын Hitachi компаниясы бас инженерінің қатысуымен жүргізуге кеңес берді.
Одан әрі тараптар құрылғылардың қызмет ету мерзімі мен компрессорлық майлардың сапасы туралы пікір алмасып, өзара тиімді ынтымақтастықты жалғастыруға сенім білдірді.