Экскурсия қауіпсіздік ережелерімен танысудан басталды. Кейін оқушылар зауыт аумағындағы технологиялық қондырғыларды аралады. Еңбекті, қоршаған ортаны қорғау және азаматтық қорғаныс жөніндегі басқарушы директор Әділет Шошанбасов оларға зауытта жүргізіліп жатқан жөндеу жұмыстары,  шығарылатын мұнай өнімдері мен олардың сапасы, кәсіпорынның әлеуметтік саясаты, жас мамандарды қолдауға арналған бағдарламалар мен кадрлық резерв туралы айтты. Оқушылар сондай-ақ қондырғылардың қауіпсіздігін қамтамасыз ететін операторлық бөлме және  технологиялық қондырғылардың макетімен танысты. Қоршаған ортаны қорғау жөніндегі инженер Мөлдір Борашева жиналғандарға зауыттың мұражайы мен бай тарихы туралы кеңінен баяндап берді.
«АМӨЗ-дің жұмысымен алғаш танысуым. Мұнай өңдеушілердің  немен айналысатынын көріп, білдім. Олар Қазақстандағы мұнай ресурсын пайдаланып, оны өндеу арқылы жанармай шығарып, еліміздің экономикасын көтеруде. Зауыт ресурс ретінде Жайықтың суын пайдаланады. Алдағы уақытта өндіріске кететін суды кері пайдалану процессін бастағалы тұр. Бұдан бөлек зауыттан шығатын түтіндердің ауамызға әсер етпеуі үшін де қолға алғалы жатқан жобалары көп. Идеялары ұнады, сәтті іске асыруға тілектеспін», - деді сынып жетекшісі Сание Айгюн.
    Экскурсия соңында оқушылар болашақта АМӨЗ-ге жұмысқа орналасып, ел экономикасы мен экологиясын жақсарту туралы ойларымен бөлісті.