АМӨЗ-де Атырау қаласының ардагерлер кеңесінің кезекті пленумы өтті. Жиынға зауыт басшылығы мен ардагерлері де қатысты. Кездесуде жаңа саяси реформаларды іске асырып, Жаңа Қазақстан құрудағы аймақ ардагерлерінің қызметі мен АМӨЗ-дің экономикалық және экологиялық рөлі туралы сөз болды.
Алдымен жиналғандар зауытты аралап, жөндеу-алдын алу жұмыстарының барысымен танысты. Кейін мұражайға бас сұғып, зауыттың тарихы мен бүгіні туралы ақпарат алды.
   Дөңгелек үстел басында зауыттың ұлттық экономиканы дамытудағы рөлі, сапалы мұнай өнімдерін шығарудағы жетістікері мен қоршаған ортаны қорғау саласында іске-асырылып жатқан жобалар туралы сөз болды. 2021 жылы АМӨЗ 5 млн 473,5 мың тонна шикі мұнайды өңдеп, тарихи жетістікке қол жеткізді. Кәсіпорын өткен жылы ел бюджетіне 76,6 млрд теңгеден астам салық төлесе, биылғы 9 айдың ішінде бұл көрсеткіш 89 млрд теңгені құрады. АМӨЗ-дің қоғаммен байланыс, мемлекеттік органдармен, мердігер ұйымдармен жұмыс және әкімшілік мәселелер жөніндегі департаментінің директоры Серік Арыстан табиғатты қорғауға бағытталған Tazalyq жобасы туралы баяндады.
– Бұл жоба пайдаланған сарқынды сулардың тазалығын арттыруға, сарқынды сулардың каналын реконструкциялауға және булану өрістерін рекультивациялауға бағытталған. Tazalyq жобасы аясында ашық каналдың орнына жерасты құбыры салынып жатыр. Сонымен қатар булану алаңдарында тиісті жұмыстар жүргізілді, – деді ол.
   Сөз алған Атырау қалалық ардагерлерлер кеңесінің төрағасы Кеңес Қосыбаев жиынды АМӨЗ аумағында өткізудің басты мақсаты – зауыттың зиянды қалдықтарды азайтуға бағытталған жобаларымен танысу екендігін атап өтті.
– Көпшілік тұрғын зауыттан шығатын қалдықтар халық денсаулығына зиян деген пікірде. Өндіріліп жатқан өнім зиянсыз болмайтыны рас. Бірақ зауыт өз кезегінде қалдықтардың халыққа зиянын тигізбеу мақсатында күрделі істер атқаруда, оған ардагерлер болып көз жеткіздік. Зауыттың көгалдандыру, тазалық жұмыстары қоғам өкілдеріне жетеді деп ойлаймын. Бұл кәсіпорында еңбек қауіпсіздігі, тәртібі, әлеуметтік пакеті, барлық қамтамасыз ету жағдайлары жақсы дамыған және әрі қарай осы бағытта қарқынды дами берсін, – деді ардагер.
   Зауыт қызметінің ашықтығы мен ақпаратқа қолжетімділік деңгейі туралы айтқан «АМӨЗ» ЖШС-нің экоомбудсмені Салтанат Рахимова кәсіпорын жанынан құрылған Қоғамдық Экологиялық Кеңеске ардагерлер тарапынан мүше сайлау туралы ұсыныс білдіріп, оларды қаладағы экологиялық мәселелерді бірігіп шешуге шақырды.