Атырау қаласында іс-сапармен жүрген Литва Республикасының ресми делегациясы АМӨЗ-де болды. Литваның Қазақстандағы Төтенше және Өкілетті елшісі Гинтаутас Васюлис бастаған делегация құрамында Литва Республикасының Алматы қаласындағы бас консулы  Гвидас Керушаускас пен Литваның Қазақстандағы елшілігінің транспорт саласы бойынша атташесі Гитаутас Юндзила бар.
   Алдымен қонақтар зауыттағы технологиялық қондырғылардың жұмысымен танысты. Мамандар оларды кәсіпорынның тарихы, ел экономикасында алатын орны мен жөндеу-алдын алу жұмыстарының барысымен таныстырды. Кейін кездесу дөңгелек үстел басында жалғасып, тараптар екіжақты қарым-қатынасты дамыту жолдарын талқылады. АМӨЗ-дің бас директоры Мұрат Досмұратов дипломаттарға алдағы жоспарлар туралы айтып, зауыттың технологиялық және экономикалық тұрғыдан тиімді кез-келген әріптестікке дайын екенін жеткізді.
   «Біз мұнай өңдеу тереңдігін ұлғайту жолдарын қарастырудамыз. Сондай-ақ өнімдерді мономерлер күйінде өңдеу мүмкіндіктері де талқылануда. Алдағы уақытта параксилол өңдеу де жоспарда бар. Мажейкяйдағы мұнай өңдеу зауытымен әріптестік қарым-қатынас орнатуға дайынбыз», - деді зауыт басшысы.
   Литвалық дипломаттар үшін АМӨЗ-дің жұмысымен танысу – жергілікті мамандармен тәжірибе алмасудағы жаңа мүмкіндік. Литваның Мажейкяй қаласында орналасқан МӨЗ Еуропадағы жиырма алпауыт мұнай өңдеу компанияларының қатарына кіреді. Қазір мекеме күрделі жаңғырту жұмыстарынан өтуде және қазақстандық кәсіпорындармен серіктестік орнатуға ниетті.
   «Литвадағы мұнай өңдеу компаниясы өңдеу тереңдігін ұлғайту, қосылған құн салығын арттыру, ресурстарды емес, жартылай өнімдерді экспортқа шығару мәселесінде президент Қ.Тоқаев атап өткен және АМӨЗ ұстанатын бағытты қолдайды. Біздің мұнай өңдеушілердің мұнайхимия саласын дамыту мен жаңғыртуға негізделген жобалары бар. Литвалық мамандар бұл саланың Қазақстанда дамуына да үлестерін қоса алады», - деді Гинтаутас Васюлис.
   Кейін кездесуге қатысушылар өзге де бірқатар мәселелерге қатысты пікір алмасып, екі жақты тиімді серіктестік орнатуға мүмкіндіктер табылатындығына сенім білдірді.