Алғаш рет Атырау МӨЗ-де технологиялық құрылғыларды кезекпен жөндеу жұмыстары басталды. Бұл мұнай өнімдерін шығаруды тоқтатпауға мүмкіндік береді. Жөндеудің мұндай тәсілі Қазақстандағы мұнай өңдеу зауыттарында бұрын-соңды қолданылмаған.
   Мұнайды бастапқы өңдеуге арналған екі қондырғының болуы технологиялық қондырғылардың  бір «тізбегі» жөндеуде болған кезде екіншісінің жұмыс істеуіне мүмкіндік береді. Сондықтан зауыттың жұмысы толық тоқтатылмайды. Жөндеу барысында АМӨЗ  50-70 % тең қуаттылықпен мақсатты өнім шығаруды және жөнелтуді жалғастырады.

   «Бұл АМӨЗ тарихындағы ең күрделі жөндеу. Зауытта бұған дейін мұндай көлемдегі жөндеу жұмыстары болған емес. Жөндеу ұзаққа созылады. Құрылғылардың кейбірі 20 күнге жуық уақыт жөнделеді. Ал каталитикалық крекинг процесі жүретін ең күрделі қондырғы 45 күнге жуық уақыт жөндеуде болады. Біз «тізбекті» жөндеу тәсілін қолданудамыз. Яғни бір тізбек жөндеуде болғанда, екіншісі жұмыс істейді», - деп атап өтті «ҚазМұнайГаз» ҰҚ» АҚ мұнай өңдеу және мұнайхимия департаментінің директоры Дмитрий Макеев.

   Қондырғыларды пайдалану мен қызмет көрсетудегі мұндай тиімділік зауытта бұған дейін кезең-кезеңімен жүргізілген жаңғырту жұмыстарының нәтижесінде мүмкін болып отыр.
   Алдағы уақытта зауыт жөндеу жұмыстарын кезең-кезеңімен, бір жылда бір «тізбекті» жөндеуден өткізуді жоспарлап отыр. Жөндеудің мұндай жүйесі мұнай өңдеу көлемін ұлғайтып, өнімдер санын арттыруға мүмкіндік береді. Осылайша АМӨЗ ішкі жанар-жағар май  нарығына әсерді азайтып, жөндеу жұмыстары кезінде әлеуметтік маңызы бар мұнай өнімдерін шығаруды қамтамасыз етпек.
   Еске сала кетейік, ҚР Энергетика министрлігімен бекітілген жоспарлы-алдын алу жөндеу кестесіне сәйкес 2022 ж 1 қазанында АМӨЗ-де жөндеу-алдын алу жұмыстары басталды.