«АМӨЗ» ЖШС Бас директоры Мұрат Досмұратов өз есебінде кәсіпорын қызметінің өндірістік-экономикалық көрсеткіштеріне, есепті кезеңнің жоспарына енгізілген кадрлық және әлеуметтік бағдарламаларына назар аударды. Ол зауыттың бірінші жартыжылдықта барлық жоспарланған қаржылық және өндірістік міндеттерді орындағанын баса айтты. Мәселен, 2022 жылдың 6 айында зауыт 2 681 мың тонна шикі мұнай өңдеді, бұл жоспардың 108,1% - ын құрады. Атырау мұнай өңдеу зауытынан Қазақстан Республикасының бюджетіне 49 млрд теңгеге жуық салық түсті, соның ішінен республикалық бюджетке - 10 млрд теңге, жергілікті бюджетке - 38 млрд теңгеден астам салық түсті.

Содан соң кәсіпорын басшысы еңбек қауіпсіздігі және еңбекті қорғау саласындағы оң көрсеткіштерді атап өтті. Есепті кезеңде АМӨЗ-де бірде-бір жазатайым оқиға немесе өндірістік жарақат тіркелген емес. Зауыт басшысы коронавирусқа қарсы вакцинацияның жалғасып жатқан науқанына және өндірісте ұжымдық иммунитетті дамыту қажеттілігіне де көңіл аударды. Бүгінгі күні зауытымыздан 83,7%-дан астам қызметкер қайта вакцинацияланды.

Қорытындылай келе, Мұрат Досмұратов ұжымға жақсы қызметтері үшін алғысын білдіріп, 2022 жылдың екінші жартысына арналған мақсаттар мен міндеттерді белгіледі: қоршаған ортаға теріс әсерді азайту, мұнай өңдеу бойынша өндірістік көрсеткіштерге қол жеткізу, өндірістегі жазатайым оқиғаларға жол бермеу, қарыздар төлеу бойынша міндеттемелерді орындау.

 Баспасөз қызметі