Көрмеге қатысушыларға облыс әкімі Нұрлан Ноғаев шын тілектестігін білдірді: «- Елбасы Н.Назарбаевтың Қазақстанға инвестиция тарту аясында орындалып жатқан шара. Биыл Солтүстік Каспий өңірлік мұнай және газ көрмесі осымен 16 рет өткізіліп жатыр. Осындай шаралардың нәтижесінде облысымызда инвесторлардың шоғыры қалыптасты. Олар Атыраудың дамуына, жалпы еліміздің дамуына зор үлес қосып жатыр. Бұл форум іскерлік қатынасты орнатуға, орныққан ынтымақтастықты жалғастыруға, игерілмеген технологиялар мен техникаларды алуға үлкен септігін тигізеді. Іскерлік байланысқа сәттілік тілеймін!».

   Көрмеге келушілер антикоррозиялық жабынның, бұрғылаудың, өнеркәсіптік қауіпсіздіктің инновациялық технологияларымен, мұнай өңдеуші кәсіпорындардың жабдықтарымен, көмірсутектерді тасымалдау және сақтау технологиясымен танысуға мүмкіндік алды. Сондай-ақ,  көрме облысқа жаңа жаңа технологиялар мен жабдықтар тартуға, Қазақстан мен халықаралық мамандардың тәжірбие алмасуына, жаңа идеялар мен жобаларды жүзеге асыруға сеп болмақ. Халықаралық көрмеге ҚР Энергетика министрлігі, Атырау облысының әкімдігі, «ҚазМұнайГаз» ҰК және KAZENERGY" қауымдастығы  ресми қолдау көрсетті.

     Қазақстандық тауар өндірушілерді қолдау және шетелдік компаниялармен қарым-қатынас орнатуда бұл инвесткөрменің маңызы зор. Сондай-ақ, Қазақстанда мұнай-газ секторында жүзеге асырылып жатқан ірі жобаларды шетелдіктермен бірлесе игеруді көздеген келелі келісімдер осы көрме аясында жасалынғанын атап өткен жөн. Инвестформ қорытындысында Атырау облысы әкімдігімен инвесторлар арасында 3,3 млрд. теңгені құрайтын сауда-экономикалық бағыттағы 9 меморандумға қол қойылды.