Жеңімпаздарды арнайы құрылған қазылар және көрермендердің өздері анықтаған болатын. Ұлттық құндылықтар дәріптелетін байқауға мыңдаған жұмысшысы бар Атырау мұнай өңдеу зауытанан Касановтар мен Бакаровтар отбасы қатысты. Олар қалалық байқау барысында үлгілі отбасы екендіктерін, бала тәрбиесі мен жас өскіннің талантын ұштаудағы өмірлік ұстанымдары мен тәжірибесін көрсетіп бақты. Мерекелік шарада  «Нұр Отан» партиясы облыстық филиалы төрағасының бірінші орынбасары Нұрлыбек Ожаев зауыттық Касановтар мен Бакаровтар отбасына облыс әкімі, «Нұр Отан» партиясы Атырау облыстық филиалының  төрағасы Нұрлан Ноғаевтың атынан «Алғыс хат» табыстап, бағалы сыйлықтар тарту етті.
    Атап өткен жөн, Касановтар отбасының отағасы 59 жастағы Ғалымжан Қопайұлы зауыт басқармасында бас энергетик бөлімінің жетекші инженері. Жұбайы Қызылбасова Гүлнара Сансызбайқызы ондаған жылдар облыстық Құрманғазы атындағы балаларға арналған музыка мектебінде балаларды фортепяноға машықтандырды. Бүгінде зейнеткер. Екеуі 1978 жылы отау құрған. Үш ұл, бір қыз тәрбиелеп өсірген жандар. Ұл-қыздары әке жолын қуып, зауыттың бөлімшелерінде мамандықтарына сай қызмет атқарады. Келіні де зауыт қызметкері. Балаларынан немере сүйіп отыр. Байқауға осы немерелерімен бірге қатысты.
       Бакаровтар отбасының отағасы Асан Есімұлы 46 жаста. Зауытта Мұнай өңдеу өндірісінің технологиялық сорғы машинисі. Жұбайы Қабиева Гүлмира Ғизатоллақызымен 1994 жылы отау құрған. Отбасында екеуі 7 бала тәрбиелеп отыр. Гүлмира Ғизатоллақызы «Күміс алқа» және «Алтын алқалы» ана. Тұңғыштары Есімова Гүлдәурен зауытта қызметкер. Көп балалы отбасы өнерлі.
       Жыл сайын өткізілетін дәстүрлі «Мерейлі отбасы» ұлттық байқауына зауытымыздан әлі де үлгілі отбасылардың қосыларына сеніміміз мол. Айта кеткен жөн, Астанада өтетін ақырғы республикалық байқауға Атырау облысы атынан Қаршыгеновтер отбасы жолдама алды.