Зауытқа келгеніне бір жыл да болмаған Қанаттың «Үздік маман» байқауына қатысуының өзі қайсарлық болар. Байқау жарияланған соң, комиссия алдына барып қатысуға өзі еркімен сұранып, тілегін білдірген. Ол өзін тәуекелшілдер қатарынан санайды. Мектеп бітіргенде Қазақстан-Британ Техникалық университетіне тәуекел еткен. Түсті. 2014 жылы органикалық заттардың химиялық технологиясы мамандығы бойынша жақсы бітіріп шықты. Былтыр мұнай өңдеу зауытына да тәуекелмен келген. Қабылданды. Ол басқа да жұмыс орындарына әлемдік дәрежедегі білімімен алынар еді. Бірақ, отандық өндіріске үлес қосу мақсатында Атырау мұнай өңдеу зауытын таңдады. «- Халықаралық деңгейде теориялық білім алдым. Осы білігімді дәлелдегім келді. Тәжірибем, еңбек өтілім аз шығар. Қобалжу да болды. Дегенмен, өзім сұранып, тәуекел еттім. Осындай сайыстар ғана маманның шын мүмкіндігін ғана сынайды»,- дейді Қанат Раукен. Жұмысқа алынған кезде ол алдымен ЛГ қондырғысында оператор бола жүріп, өндірістің қыр-сырына қанықты. Талапты жасты байқаған басшылар биыл наурыз айында мұнайды тереңдетіп өңдеу кешені каталитикалық крикинг қондырғысына оператор қызметіне ауыстырды. Мұнда өзі қатарлас жастар көп. Бәрі де жаңа өндірістік технологияны меңгерген мамандар. Сондықтан зауыттың болашағы бүгінгі жас мамандардың еншісінде екенін білетін Қанат алға ұмтылады. Жұмыстан қолы қалт етсе, білімін тереңдетуге, кеңестер алуға жұмыстанады. Сәті салса, келер жылы Қазақстан-Британ Техникалық университеті жанындағы магистратураға тапсырып, оқуын жалғастыру ойында бар. Әрине, ол үшін үшінші жүлделі орын да үлкен жеңіс. Сайыста шынығатын Қанат келесі жылы да «Үздік маман» байқауына қатысуға дайындалмақ. Өзінің алдағы мансабы мен өмірін мұнай өңдеу зауытымен байланыстырған жас маман болашағынан үмітті.