Үкімет басшысы жаңғырту нысандарының құрылыс алаңдарын қарап шықты және отандық мұнай сервисі мәселелері бойынша «ҚазМұнайГаз – өңдеу және маркетинг» АҚ мен «Атырау МӨЗ» ЖШС басшылығының, сондай-ақ Ақтөбе, Батыс Қазақстан, Қызылорда, Маңғыстау облыстары өкілдерінің қатысуымен кеңейтілген жиналыс өткізді.
«АМӨЗ» ЖШС Бас директоры Қ. Оразбаев К. Мәсімовті «Атырау мұнай өңдеу зауытында Мұнайды терең өңдеу кешенін (МТӨК) салу» жобасы бойынша жұмыстардың барысымен таныстырды. Қ. Оразбаев атап өткендей, бұл жоба іске асырудың соңғы кезеңінде тұр.
Қазіргі уақытта МТӨК алаңында құрылыс-монтаждау, оның ішінде бетон құю, жабдықты, металл конструкцияларын, технологиялық құбыр мен инженерлік желілерді монтаждау жұмыстары жүргізілуде. Іргестарды қалау және басқа да жұмыстарды орындау кезінде 75 113 текше метр бетон құйылды (74,6%). Қондырғылардың құрылыс алаңдарында 20 801  қада орнатылды (99,5%), 31 074 тонна металл конструкциялары (87,8%), 48 920 метр жер асты құбырлары (77,2%) және 1 985 темірбетон бағаналары (97,7%) монтаждалды. Құрылыс-монтаждау жұмыстарына 1 513 адам жұмылдырылды.
МТӨК пайдалануға берілген кезде Кеден Одағының Техникалық регламенті талаптарына сәйкес К4 және К5 (Еуро-4 және Еуро-5 аналогтары) кластағы мотор отынын шығару қамтамасыз етілетін болады. Зауыттың қуаты жылына 5 млн-нан 5,5 млн. тонна мұнайға ұлғаяды. АМӨЗ-ді жаңғырту ашық түсті мұнай өнімдеріншығаруды едәуір ұлғайтуға мүмкіндік береді: автобензин – 2,4 есе, әуе отыны – 10 есе.
МТӨК-те жұмыс істеу үшін 444 штаттық бірлік енгізілді. Екі кезеңдік іріктеудің нәтижелері бойынша МТӨК бөлімшелеріне 176 адам жұмысқа қабылданып қойды. Кәсіпорынның 216 қызметкері зауыттың жұмыс істеп тұрған бөлімшелерінен МТӨК жұмысына ауысу мақсатында қайта оқудан өтті.
Кездесу барысында Премьер-Министр зауытты жаңғыртуды уақтылы аяқтауға және МӨЗ-дің операциялық тиімділігін әрі қарай арттыруға қатысты бірқатар тапсырма берді.

Анықтама:МТӨК жобасының құны - 2 050 млн. АҚШ доллары. Жобаны қаржыландыру бірнеше кредиттік желі бойынша жүргізіліп жатыр, оның ішінде – Қазақстанның Даму Банкі бар.
Жоба бойынша мердігерлер «Sinopec Engineering Group» (ҚХР), «Marubeni Corporation» (Жапония) және «ҚазҚұрылысСервис» МГҚК АҚ (ҚР) болып табылады.

«АМӨЗ» ЖШС Қоғаммен байланыс бөлімі