Әзиза Дүйсешева мектеп жасынан түрлі пәндік олимпиадаларға қатысып дағдыланған. Алғашқыда мектепішілік, одан соң, облыстық, республикалық сайыстарда осы химия пәніне зеректік танытып жүлдегер атанып жүрді. Мектеп бітірген соң, Қазақ Ұлттық Техникалық университетінде оқып жүргенде де байқаулардан тыс қалған емес. Университетті 2011 жылы химик-технолог мамандығы бойынша бітірісімен Атырау мұнай өңдеу зауытына ойланбастан келген. Дегенмен, сол жылы кадрлық резервке алынып келер жылы бақ сынап көруге бел буады. 2012 жылы қайтара келеді. Осы жолы мектеп жасында осы зауытта жұмыс істеу арманы болған Әзизаның жолы болып, Орталық зауыт зертханасына лаборант болып қабылданады. «- Зауытқа келер алдында мені екі мұнай компаниясы жұмысқа шақырған болатын. Мен мұнай өңдеу зауытын таңдадым. Себебі, мұнда өндірісті жаңғыртулар жүріп жатты. Шығарылатын өнім түрлерін көбейту жолға қойылған. Болашағы бар зауытқа өз үлесімді қосқым келді».
     Әзиза алдымен тауарлық зертханада жұмыс атқарды. Кейін бір жылдай Орталық зауыт зертханасының санитарлық-өнеркәсіптік зертханасында ағынды сулардың құрамын талдаумен айналысты. Осы қызметте жүріп, 2015 жылы алғаш рет «Үздік маман» байқауында бақ сынады. 3-ші жүлделі орын алады. Ол тұңғыш рет қатысқандықтан қобалжуы мен дайындықтың осалдығы болғанын жасырмайды. Қаймықпаған жас маман биыл да байқауға қатысып, өз білігін көрсетуге талпынды. Өткеннен алған сабағы бар, саласы бойынша дайындығын нықтап келген еді. Жеңімпаз боларына сенімді болатын. Алайда, кейбір сұрақтардан сүрініп қажетті ұпайға қол жеткізе алмай қалды. Нәтижесінде 2 орынды місе тұтқан. Әзиза мұнымен шектеліп қалғысы жоқ. Келер жылы да «Үздік маман» байқауына қатысып бақ сынамақ. Межесі- жеңімпаз атану. Өзінің білігі мен тәжірибесін мойындату. Байқау мен үшін кәсіби дайындығымның бағдары, дейді ол. Бұл да маған сатылап келетін сын шығар. Талапты да қайсар қыз түбінде жеңімпаз боларына сенімді. Себебі, оны жетелеп тұрған жігер бар. Жігерін қайрайтын адам ғана нәтижеге қол жеткізбек.