Ол білігін сынады. Сайысқа қатысқандағы мақсаты өз мамандығының қаншалықты дәрежеде меңгергендігін, деңгейін анықтап көргісі келді. Нұргүл басқа әріптестеріне қарағанда байқауға қатысуға өзі ерік білдірген. Орталық зауыт зертханасына жұмысқа тұрғанға дейін, осы мамандығын игергенше оқудан қол үзген жоқ. Мектеп бітірісімен Атырау политехникалық колледжіне түсіп, технолог мамандығына оқыды. Колледжді бітірген соң да, еңбек етуге асыққан жоқ. Оқуын жалғастыру мақсатында Атырау мұнай және газ институтында алғашқы мамандығын тереңірек оқыды. Оқу инемен құдық қазғандай. Нұргүлдің бірнеше жыл білім қуғаны зая кеткен жоқ. 2013 жылы зауытқа жұмысқа алынарда басқа талапкерлерге қарағанда оқ бойы озық тұрғаны оқуының нәтижесі еді. Алғыр қыз осылайша Орталық зауыт зертханасының бақылау зертханасына қабылданды. Жұмысына тиянақты, жауапты. Бүгінде зертхана заманауи құрал-жабдықтармен қамтылған. Жаңа заман жаңаша жұмыс істеуді талап етеді. Сараптау да бұрынғыдан да дәл шығуы үшін лаборантқа алдымен біліктілік қажет. Бұл тұрғыда Нұргүл кәсіби шыңдалғанын көрсете білді. Сондықтан да «Үздік маман» байқауына қатысу үшін еңбек өтілі үш жылға толмағандар қатарына сенімді кірген. «-Ұжымдағы әріптестеріме рахмет. Байқауға қатысуға ниет еткенімде қолдап әкетті. Бұрыннан келе жатқан мамандар мені дайындауға кірісті. Бәрінен де бір ауыз жылы қолдау лебізі мені жадыратып жіберді. Сондықтан сынақтарда бар білгенімді салып, ұмтылысымды көрсеттім»,-дейді Нұргүл Қонысова.
     Байқау сынақтарынан өту оған әрине, оңай болған жоқ. Өз кәсбінің сырын меңгерумен қатар, басқа да саладан хабардар болу керек. Бастысы тәуекелге салып, байқауға қатысып көрді. Бағын сынады. Алғашқы нәтиже жаман емес, үшінші жүлделі орын. Келесіде үш жыл өтілі барлар қатарында байқауға қатысып көрмек. Бірінші байқау оның білігін айқындады, дейңгейін байқатты. Енді оны ары қарай дамытып, білігін шыңдай түсу жас маманның алдындағы үлкен белес.