«Ақ Бұлақтағы» қызықты демалыс

27.08.2026

21 просмотров

«Атырау мұнай өңдеу зауыты» ЖШС қызметкерлерін әлеуметтік қолдау бағдарламасы аясында биыл кәсіпорын жұмысшыларының 300-ден астам баласы жазғы демалысын «Ақ Бұлақ» сауықтыру лагерінде өткізді. Іле Алатауының көркем табиғаты аясындағы демалыс жаңа таныстықтар, қызықты оқиғалар, сүйікті белсенділіктер мен жарқын әсерлерге толы болды.

Лагерь бағдарламасы 7-14 жас аралығындағы оқушылардың денсаулығын нығайту, шығармашылық қабілеттерін жетілдіру мен белсенді өмір салтын қалыптастыруға бағытталды. Балалар бассейнде жүзіп, спорттық ойындарға, атпен серуендеуге, би және актерлік шеберлік сабақтарына қатысты. Сондай-ақ сәндік-қолданбалы өнер бойынша шеберлік сабақтары, арт-терапия, тимбилдингтер, табиғатқа жорықтар, аспалы жолмен серуендеу және әуе шарымен көтерілу сияқты түрлі белсенділіктер ұйымдастырылды.

Демалыспен қатар балалардың білім алуына да көңіл бөлінді. English Club сабақтарында ойындар, диалогтар мен командалық тапсырмалар арқылы олар сөздік қорларын толықтырып, жаңа сөздерді күнделікті қарым-қатынаста қолдануды үйренді.

Fashion Day аясында қатысушылар түрлі образдар ойластырып, киімдер мен аксессуарлар таңдап, шығармашылық идеяларын подиумда көпшілік назарына ұсынса, Hollywood Day кезінде әр отряд шағын киностудияға айналып, қысқаметражды фильмдер түсірді.

QAZAQ Quest жобасы арқылы демалушылар қазақ халқының ұлттық дәстүрлері, тарихы және мәдениетімен танысты. Ал AB VISION, Shake Your Body, AQBulaq Sultany, AQBulaq Arui жобалары, концерттер мен шығармашылық кештер балалардың өнерге қызығушылығын арттырып, өз қабілеттерін көрсетуге мүмкіндік берді.

«Біз үшін Атырау мұнай өңдеу зауыты қызметкерлерінің балаларын қабылдау – үлкен мәртебе әрі жауапкершілік. Бізге сенім білдірген зауыт басшылығына, кәсіподақ ұйымына және ата-аналарға алғыс айтамыз. Балалардың лагерьден жақсы көңіл-күймен, жаңа достар тауып, пайдалы тәжірибе жинап, өзіне деген сенімі артып оралғаны біз үшін ең үлкен нәтиже», – деді лагерь басшысы Ранвир Абдурашитов.
Айта кетейік, Атырау МӨЗ қызметкерлерін әлеуметтік қолдау бағдарламасы аясында кәсіпорын балалар лагеріне жолдама құнының 70%-ын төлейді. Ал 18 жасқа дейінгі бес баласы бар отбасылардың балалары үшін жолдама құнының 70%-ын кәсіпорын, қалған 30%-ын кәсіподақ ұйымы өтейді.

«АМӨЗ» ЖШС баспасөз қызметі

Назад к списку новостей

Жаңалықтар Сурет галереясы Бейне галереясы Корпоративтік БАҚ

Барлығы AMOZ Alemi газеті

Еңбек адамы