Жалпыұлттық коалиция өкілдері Атырау МӨЗ қызметкерлерімен кездесті

Дүйсенбай Тұрғанов өз сөзінде жаңа Конституция жобасы туралы еңбек адамдарының пікірі аса маңызды екенін  атап өтті. Депутат құжаттағы адам құқықтарын қорғау, қоршаған ортаны сақтау, бір палаталы парламент жүйесіне көшу, Халық кеңесін құру және вице-министр институтын енгізу секілді өзгерістерді түсіндіріп, жиналғандарды алдағы референдумда белсенділік танытуға шақырды.  

Пікір алмасу барысында Кокс және күкірт өндірісінің операциялық үйлестірушісі Жасұлан Төлеуов: «Негізгі Заңның жаңа жобасында «мемлекет адам үшін» деген қағида нақты бекітілген. Яғни мемлекет үшін басты құндылық – адам, оның болашағы, денсаулығы, құқығы, білімі, еңбек етуі және еңбек жағдайының қорғалуы. Бұл өзгерістер қоғамның мемлекетке деген сенімін күшейтеді. Жаңа Конституция – еліміздің тұрақты дамуын қамтамасыз етудің жолы». 

Айта кетейік, зауытта 20 ақпаннан бастап Жаңа Конституция жобасын түсіндіру жұмыстары жүйелі түрде жүргізіліп келеді. Осы мақсатта құрылған арнайы штаб өкілдері еңбек ұжымдарымен кездесіп, референдум қарсаңында ақпараттық-түсіндіру жұмыстарын жүргізуде.


«АМӨЗ» ЖШС Баспасөз қызметі