Атырау МӨЗ-де KMG Skills чемпионатының бірінші кезеңі өтті

Зертханалық тапсырманы орындауға «Ембімұнайгаз» АҚ, Caspi Bitum ЖШС, «Қазгермұнай» ЖШС, «Маңғыстаумұнайгаз» АҚ, «Өзенмұнайгаз» АҚ, «ПетроҚазақстан Ойл Продактс» ЖШС, «ҚазТрансОйл» АҚ және «Атырау мұнай өңдеу зауыты» ЖШС атынан келген 8 үміткер қатысты. Оларға Мемлекеттік стандарт (МЕМСТ) талаптарына сәйкес мұнайдың тығыздығын анықтау тапсырылды. Жұмысқа 45 минут уақыт берілді.

Тәуелсіз сарапшылар бағалау кезінде талдау дәлдігін ғана емес, техникалық қауіпсіздікті сақтау мен белгіленген регламенттен ауытқымауды, өлшеу көрсеткіштерін дұрыс оқуды, жабдықты қосу-өшіру реттілігін және зертханалық аспаптармен жұмыс істеудегі ұқыптылықты ескерді.
Қатысушылардың айтуынша, биылғы чемпионаттың форматы өзгерген. Екінші кезеңде өрт қауіпсіздігі мен алғашқы медициналық көмек көрсету дағдылары бағаланбақ. Конкурсанттар мұндай жаңашылдық бәсекелестікті күшейтіп, қызығушылықты арттыратынын атап өтті.

«Сайыс жоғары деңгейде ұйымдастырылған. Мұнда практикалық дағдыларға, маманның нақты мүмкіндіктеріне басымдық беріледі. Мен өзіме жүктелген тапсырманы  43 минутта орындадым. Әрине, бірінші болып кіріскендіктен сәл толқыныс болды.Бірақ өз нәтижеме ризамын», — деді  «Қазгермұнай»БК» ЖШС кәсіпорнының химиялық талдау лаборанты Айгерім Сейтова.

«Токарь» номинациясы бойынша «Қазгермұнай» ЖШС,  «Өзенмұнайгаз» АҚ,  «ӨзенМұнайСервис» ЖШС, «Oil Services Company» ЖШС, «Павлодар мұнай-химия зауыты» ЖШС,  «Атырау мұнай өңдеу зауыты» ЖШС және «Ембімұнайгаз» АҚ атынан келген 7 қатысушы кәсіби шеберліктерін дәлелдеді. Оларға сайыс кезінде 60 минут уақыт берілді. Бұл бәсекеде де техника қауіпсіздігін сақтау басты талаптардың бірі болды. Сонымен қатар бағалау кезінде өлшем дәлдігі мен  дайын бұйымның сызбаға сәйкестігі ерекше назарға алынды.

Тәуелсіз сарапшылар қатысушылардың дайындығын жоғары бағалады.  Саланың тәжірибелі маманы, токарьлық іске 40 жылдан астам өмірін арнаған Гурьев Латифтің айтуынша, бұл мамандықта техникалық дәлдікпен қатар зейін мен іске деген сүйіспеншілік аса маңызды.

 «Биыл конкурс кеңейтілген форматта өтуде. Бұл тәжірибе алмасу үшін өте маңызды. Мұнда өз компанияларының ең білікті мамандары жиналған. Үзіліс кезінде қатысушылар кәсіби сұрақтар қойып, біз де қуана-қуана тәжірибемізбен бөлісудеміз. Бүгін насосқа арналған деталь дайындалды. Бұл жұмыс үлкен дәлдік пен ұқыптылықты талап етеді. Қатысушылар жоғары деңгей көрсетті», — деді тәуелсіз сарапшы.

KMG Skills чемпионатының алғашқы кезеңі мұнай-газ саласындағы мамандардың жоғары кәсіби дайындығын, тәжірибесін және бәсекеге қабілеттілігін айқын көрсетті. Зертханашылар мен токарьлер өздерінің шеберлігін дәлелдеп, салада адам факторының, білім мен дәлдіктің, қауіпсіздік мәдениетінің қаншалықты маңызды екенін тағы бір мәрте айқындады. Екінші кезеңде қатысушыларды одан да күрделі әрі өмірлік маңызы бар тапсырмалар күтіп тұр.