Сенатор АМӨЗ-дегі экологиялық жобалардың нәтижесімен танысты

Сапар барысында сенатор кәсіпорында табиғатты қорғау және экологиялық қауіпсіздік саласында атқарылған жұмыстардың нәтижелерімен танысып, жоспарланған іс-шаралар туралы ақпарат алды. Зауыт басшылығы іске асқан негізгі бастамалардың тиімділігіне тоқталды.

Атап айтқанда, мұнайды электр тұзсыздандыруға арналған АТ-2 қондырғысында 36 ескірген жанарғыны ауыстыру нәтижесінде ластаушы заттар шығарындылары 252 тоннаға азайды. 

Tazalyq жобасы шеңберінде механикалық тазарту құрылыстарын жаңғыртудан кейін 2024 жылдан бері тазартылған сарқынды суларды қайта пайдаланылу көлемі 423 736 мың м³-ті құрады. Резервуарларға понтондар орнату арқылы көмірсутектер шығарындылары 80%-ға төмендеді.

2024 жылы кәсіпорынның төрт технологиялық нысанында қоршаған ортаға эмиссияларды автоматты бақылау жүйесі енгізілді. Құрылғылар нақты уақыт режимінде шығарындылар көрсеткіштерін бақылап, мәліметтерді тікелей жауапты органдарға жібереді.

Сағындық Лұқпанов су ресурстарын ұтымды пайдаланудың маңыздылығына назар аударып, Атырау МӨЗ-дің Жайық өзенінен алынатын тұщы су көлемін азайтуға қатысты жоспарларымен танысты. Еңбекті, қоршаған ортаны қорғау және азаматтық қорғаныс департаментінің директоры Еркін Сүлейменов зауытта «Тұщы су дайындау» жобасын жүзеге асыру жоспарланғанын айтты. Бұл бастама айналымдық судың сапасын арттыру арқылы сағатына 160 м³ суды үнемдеуге мүмкіндік береді деп күтілуде. Қазіргі таңда АМӨЗ Жайық өзенінен жылына шамамен 7 млн м³ тұщы су тұтынады.

Сонымен қатар, кәсіпорын атмосфераға зиянды заттардың шығарылуын азайтып, Атырау қаласының экологиялық жағдайын жақсартуға бағытталған жобаларды жүзеге асыруын жалғастырады. Атап айтқанда, баяу кокстеу қондырғысында мұнай буларын ұстау блогын, факелді газдарды қайтару жүйесін, пайдаланылған газдар желісінде компримирлеу блогын салу, сондай-ақ ЭЛТҚ АТ-2 және кокс өндіру қондырғыларындағы бу-конденсат жүйелерін жаңғырту жоспарлануда.

«АМӨЗ» ЖШС Баспасөз қызметі