Байқау қорытындысында төрт жұмысшы мамандығы бойынша: «Технологиялық қондырғылар операторы», «Технологиялық сорғылар операторы», «Технологиялық компрессорлар машинисі» және «Химиялық сараптама лаборанты» үздіктері анықталады. Атап өткен жөн, аталған байқау «ҚазМұнайГаз» Ұлттық компаниясы деңгейінде тұңғыш рет өткізіліп отыр. Сайысқа тәжірибелі мамандармен қатар еңбек өтілі 3 жылға жетпеген мамандар да қатысты. «Үздік маман-2016» байқауының ақтық сынының ашылу салтанаты зауыттың бірыңғай операторлар ғимаратында өтіп, оған «Атырау МӨЗ» ЖШС бас директорының міндетін атқарушы Ғалымжан Амантурлин,   байқаудың қазылар алқасының мүшелері: "ҚазМұнайГаз ҰК" АҚ мұнайды өңдеу және маркетинг дирекциясы директорының орынбасары  Рүстем Нығмет, "Мұнай-газ кешені қызметкерлерінің салалық кәсіподағы» РҚҰ төрағасы Сұлтан Қалиев және сайыс үміткерлері қатысты. Ашылу рәсімінде Сұлтан Қалиев «ҚазМұнайГаз ҰК» АҚ басқарма төрағасы Сауат Мыңбаевтың сайыскерлерге арнаған үндеуін оқыды. «АМӨЗ» ЖШС бас директорының міндетін атқарушы Ғ.Амантурлин: «Сайықа қатысушыларды біздің зауытта қарсы алғанымызға өте қуаныштымын. Біз «Үздік маман-2016» жұмысшы мамандар арасындағы ақтық сынның әсіресе, біздің зауытта өтуіне мақтанамыз. Бұл біріншіден, 70 жылдан астам тарихы бар зауыт еңбеккерлеріне берілген баға. Ал, байқауға қатысушылар үшін бұл өзінің біліктілігі мен тәжірибесін көрсететін жұлдызды сәт. Атап өтейін, осындай байқаулар осында жұмыс істейтін біраз жетекші лауазымдағы тұлғаларға болашағы үшін үлкен ықпал етіп, жол салды. Солардың ішінде мен де бармын. Байқаулар біздің зауытта дәстүрлі өтіп келеді. Қиын заманда да көштен қалған жоқпыз. Сондықтан да қатысушыларға жеңіс, Ақ жол тілеймін!»
       Байқауға қатысушылардың теориялық білігі мен тәжірибелік машығын үш мұнай өңдеу зауытынан арнайы таңдап алынған қазылар алқасы бағалады.  Алғашқы күні сайыскерлер тест сұрақтарына жауап берді. Екінші күні тәжірибелік тапсырмаларды еңбек өтілі 3 жылдан асқан мамандар орындады. Үшінші күні сайысқа жасы 30 –ға жетпеген еңбек өтілі 3 жылдан аспаған мамандар шықты.    Теориялық және тәжірибелік сайыстың нәтижелері толтырылған құжат Ақтау қаласындағы Орталық байқау комиссиясына жолданды. Сол жерде қорытынды шығарылатын болады. «ҚазМұнайГаз» Ұлттық компаниясы Акционерлік қоғамының жұмысшы мамандары арасында «Үздік маман-2016» байқауының жеңімпаздарын марапаттау рәсімі 7 қазанда Ақтау қаласында өтеді.